back to Books

 

شو بعدك ناطر؟

 

        إذا كان يسوع مع كل مجدو كان يترك كلّ شي، ويروح يصلّي لَوَحْدو، ويغرق بالصلاة حتى طلوع الفجر. وإذا كانت العدرا مريم بتصلّي بدون توقّف، وكلنا منقول: صلّي لأجلنا نحن الخطأة الآن وفي ساعة موتنا آمين.

وإذا كان يسوع لمّن تعمّد بنهر الأردن صلّى وانفتحت السما وحلّ الروح القدس عليه، وصوت عم بيقول هيدا إبني الحبيب. لوقا3/21

وإذا كان اسطفانس أول شهدا المسيحيّة، لمّن كان اليهود عم يرجموه بالحجارة، صلّى كرمالهم وسامحهم وانفتحت السما وشاف مجد الله ويسوع عن اليمين . أعمال الرسل7/56

وإيليا (مار الياس) صلّى ونزلت النار من السما وحرقت القربان مع الحطب.

وموسى صلّى عَ الجبل أربعين يوم ولمّن رجع، كان نور الله طالع من وجهو والناس مش قادرين يتطلّعوا بموسى

وإنت إنسان متلهم، إنسان متلك متل إسطفانس أو إيليا أو موسى... وليش ما بدّك تصلّي وتلتقي بالله؟ وخصوصاً إذا صلّيت من كل قلبك، نعم إنت قادر إنك تفتح باب السما، وبتاخد قوّة من الله، متل ما عمل شعب الله بالعهد القديم، حِمْلوا تابوت العهد وصلّوا حول أسوار مدينة أريحا، فَوَقَعْ السّور، وسقطت المدينة.سفر يشوع6/5

وكمان شو بدّي قلّك: عَ النبي دانيّال يلّي صام وصلّى، ولمّن يلّي كانوا حاقدين عليه، رميوه بجبّ الأسود. كان إنو الله خلّص دانيّال، والأسود صارت تلْحَسْ إجرين دانيّال هيدا النبي العظيم نبؤة دانيال 14/30

وعن حنّة زوجة القانة يلّي كانت عاقر، ولمّن كانت بالهيكل (صلّت إلى الربّ وبَكَتْ. ملوك أول1/10) والله قِبِل صلاتها وصارت أم صموئيل النبي.

وعن زكريا الكاهن وأليصابات لمّن صلوا، قال الملاك: (لا تخف يا زكريا فإن صلاتك قد استجيبت. لوقا1/13) وكمّل الملاك كلامو: بدّو يجيك ولد وتْسمّيه (يوحنا) وصار يوحنا المعمدان أعظم مواليد النساء. يوحنا إبن زكريا واليصابات.

وعن الفرّيسي والعشّار، وكيف الله قِبِل صلاة العشّار المتواضعة، والعشّار رجع عَ بيتو أكتر قداسة من الفرّيسي. لوقا18/14

وشو بدّي قول عن الرسول يعقوب بالانجيل يلّي قال: صلاة الإيمان تشْفي المريض. يعقوب5/15 وكمان بالعليّة لمّن كانت العدرا ومعها الرسل عم يصلّوا (وحلّ عليهم الروح القدس. أعمال2/4)

وصلّت جماعة المؤمنين (المسيحيين الأول) كرمال بطرس يلّي كان بالحبس،(وكانت الكنيسة تصلّي إلى الله بلا انقطاع لأجله. أعمال12/5)

والله قبل الصلاة وبعت الملاك وفكّ سلاسل الحديد من إيدين بطرس وْطَلَّعوا برّات الحبس. أعمال12/8

وكمان لمّن حطّو القديس بولس ورفيقو سيلا بالحبس، بقْيوا يصلّوا ويسبْجوا الله لآخر الليل. فحدثت زلزلة زعزعت أسس السجن وانفكّت قيود المسجونين. أعمال16/25

والقديس بطرس صلّى عَ البنت الميتة (طابيتا) وعاشت طابيتا من جديد. (طابيتا قومي. أعمال9/40).

ونفس الشي، صلّى القديس بولس عَ الولد يلّي وقع من تالت طابق ومات، وعيّشوا من جديد. أعمال20/10

وهلّق بعد ما عرفت دور الصلاة ومفعولها، شو هوي قرارك؟ بدّك تصلّي من كلّ قَلْبَك أم لا؟

وبدّك تتمثّل بيسوع معلّمك، وبأمّك العدرا، وكلّ القدّيسين وتبلّش تصلّي أو لا؟

الصلاة يا حبيبي هي وصيّة، وهي نصيحة من الله (صلّوا ولا تملّوا. لوقا18/1) لأنو الله بيعرف قدّيش الصلاة مفيدة، وقدّيش قادرة تحمينا وتغيّرنا وتقدّسنا وتخلّصنا.

بدي قلّك إنو الدني كلّها، كلّ الخلايق والحيوانات، الطبيعة، الشمس، القمر والليل والنهار والكواكب والهوا والمي، كلّها بتصلّي عَ طريقتها وبتشكر خالقها.

وإنت ليش ما بدّك تصلّي يا حبيبي؟ ما معك وقت؟ مشغول؟ وشو شاغلك عن الله وعن خلاص نفسك؟

مش عارف إنك إذا ما صلّيت، إنو إنت وشغلك بدّك تروح (تزول) وكلمة الله باقية ما بتزول (السما والأرض تزولان وكلامي لا يزول. مرقس13/31) وهلّق شو رأيك إشرحلك عن الصلاة؟

الصلاة يا خيّ مش تحريك شفاف ولا تمتمات، ومش عبادة صور ولا أيقونات، ومش ترديد مقاطع أو كلمات، الصلاة هي شوق من القلب للقلب وإنت بالصلاة بتسكب نفسك وأشواقك قدّام الله بالذّات.

وإذا كانت صلاتك مُستجابة، بتاخد منها حياة.

لكن إذا إنت احتقرت وصايا الله، راح تكون صلاتك محتقرة قدّامو. وإذا كان لسانك أو فكرك أو جسمك مدنّسين أو زعلان من حدا، صلاتك مش راح تكون مقبولة. (وإن قمتم للصلاة فاغفروا، لكي يُغفر لكم).مرقس11/25 لأنو لازم يكون كلّ شي طاهر.

وبالصلاة، إنت عم تحكي مع الله، كأنو إبن عم يحكي مع بيّو.

ولازم تعرف إنو الصلاة القادرة، فيها تخرق المجهول وتوصل عَ قلب الله. قال الملاك لكرنيليوس (قائد المئة) إن صلاتك قد صعدت أمام الله. أعمال 10/4.

وما لازم تفكّر إنو الصلاة فرض واجب عليك، ولا أمر. لأنّو الصلاة هي وصيّة ونصيحة، وإذا ما صلّيت عن حبّ، إنت بتكون متدرّج ومبتدئ بالصلاة.

ولأنك محتاج، محتاج لخبزك، أعطنا خبزنا كفاف يومنا، محتاج للغفران، إغفر خطايانا، محتاج حتى يحميك من الشرير، نجّنا من الشرير، ما بقى فيك تتكبّر بالصلاة، أو إنّك تصلّي من راس شفافك. ولازم تكون متواضع ومن كل قلبك عم تتواصل مع ربّك.

وبالآخر يسوع والرسل والعدرا بهيدي الإيام، عم ينصحونا ويترجّونا إنو نصلّي. صلّوا في كل حين لكي يتهيأ لكم أن تنجوا من جميع ما هو ومزمع أن يكون. لوقا21/36. أي جميع ما سيحدث للبشريّة..

لقد شرحه القديس متى: متى24/6-12: ستسمعون بحروب وبأخبار حروب، ستنهض أمّة على أمّة، ومملكة على مملكة، وتكون مجاعات وزلازل وأوجاع، ويسلمونكم إلى الضيق...

وما هو مزمع أن يكون، لقد شرحه أيضاً القديس لوقا:

وتكون علامات في الشمس والقمر والنجوم، وكَرْبٌ للأمم على الأرض، حيرة من عجيج البحر، وتزهق الناس من الخوف في انتظار ما سيأتي على المسكونة. لوقا21/25. سيكون إضطهاد وجوع وقتل واستشهاد وصعوبات وكوارث وأوبئة وأمراض... . وكل من يصلّي ويدعو باسم الرب يخلص. أعمال 2/21.

لقد اقتربت آخرة كل شيء، فالزموا إذن القناعة والتعقّل (للقيام) بالصلوات. 1 بطرس4/7.

-       القناعة: البعض من كتر الشغل (حتى يحصلوا عَ الغنى والرفاهية) ضيّعوا عَ حالهم فرصة الصلاة، والتواجد مع الله، وخسروا بركات كتيرة.

-       التعقّل: بدنا نترك العقل يحكم بالأمور، ويعطي للشغل حقّو، وللصلاة وقتها.

وهلّق ما بقى فينا إلا ما نصلّي. وبرجع بذكّر الجميع. شو بعدكم ناطرين؟

 

 

                                               

الخوري منير حاكمه

القبيات، ايلول 2010

 

back to Books